Хуморот е здрав – смеата лековита

Драги ученици,

на денот на смеата и шегата, Ве поздравувам и посакувам што почесто да се смеете и да имате што повеќе причини за смеење, бидејќи здравиот хумор и смеата имаат изразито повеќекратно позитивно дејство.

Смеата и хуморот смируваат, хармонизираат, социјализираат… Предизвикуваат пријатни емоции, прирoдно обезбедуваат состојба на опуштеност, ги олеснуваат, зацврстуваат и унапредуваат интерперсоналните односи.

Преку хуморот и смеата многу нешта полесно се кажуваат, ја менуваат перцепцијата на проблемот, проблемот го прават решлив, помагаат во одржувањето на емотивна рамнотежа и позитивен став, така придонесуваат и подобро да се адаптираме на новонастанатите околности . Во поновите истражувања се нагласува и дека го зголемува бројот на клетки кои произведуваат антитела, што го јакне имуниот систем и го чува нашето здравје.

Музиката која ја сакаме делува закрепнувачки, не опушта, дава сила, елан, волја и добро расположение.  Негувајте навика на слушање на добро одбрана музика , музика што ви создава пријатни емоции и профинува духот.

Танцувањето е одличен начин да се ослободиме од напнатост. Значи музика и да танцуваме, …со други или сами….важно да играме, скокаме….танцуваме J

Физичка активност.  Човековиот организам е конструиран за активност, не за мирување. Затоа, за да остане способен и издржлив треба да се движиме.  Кај лица кои не се движат доволно се јавуваат несоница, млитавост, проблеми со концентрација, нервоза…   Затоа, за да бидеме здрави и витални треба да се движиме и практикуваме физички активности кои треба да бидат правилни и оптимално дозирани.    Не случајно кога некога сакаме да го прашаме “како е?” , го прашуваме “како оди?”.

Боите , покрај декоративната функција, делуваат на нашата психа. Колор терапијата не е новина на современиот човек. Во стар Египет и Грција боите се користеле за исцелување во т.н. храмови со лековита светлина, на пр. Хелиополис.

Истражувањата покажуваат дека сината боја го намалува крвниот притисок, а црвената го повишува. Подолгото изложување или престој во црвено или портокалово обоени простории влијае на  намалување на концентрацијата, предизвиува нетрпеливост, пад на концентрацијата, раздразливост, напнатост, нервоза…

Зелената боја делува смирувачки, обезбедува внатрешен мир.   Гарсија Лорка пишувал: “…зелено, зелено, те сакам зелено…”.   Влијанието на зелената боја е уште една причина за што повеќе да престојуваме и да се движиме во природа.

Оптимизмот помага во соочувањето со проблемите и создавање подобри социјални мрежи.  Кон себе и кон другите да се однесуваме со почит и љубов, не понижувајќи се себе си, а и не воздигнувајќи се себе си, ни другите. Да завладееме со самоконтрола над своите мисли, своите чувства, своето однесување. Да воспоставиме душевна рамнотежа без која нема оптимизам и успех во животот.

Драги ученици,

фокусирајте се на позитивни нешта, комуницирајте со драги луѓе кои ве смеат и опуштаат, гледајте, читајте, слушајте пријатни содржини… и така, со оптимизам, позитивен став и расположение можеме да го надвладееме секој предизвик!  ….можеме   !

Ќе ме израдувате ако ми ги испратите вашите омилени вицеви, посебно ако се за психолози.

Поздрав

Тони Анев  –  училишен психолог

anevtoni@yahoo.com